Avust 2010: Stadi da la publicaziun
Il november 2009 è cumparì il fascichel dubel 167/168 (MANKI – MANZÖGNA), l’avust 2010 il fascichel dubel 169/170 (MANZÖGNA – MARIA) che furman la prima e la secunda furniziun dal tom 13.
Ils dudesch toms (A – MANIZZUIRA) publitgads cumpiglian 9319 paginas da duas colonnas, format A4, cun bleras fotografias en culur (dapi il 1998), dissegns e cartas linguisticas, sco era 568 paginas cun differents registers.
Zercladur 2010: Publicaziun da las Annalas da la Societad Retorumantscha 123 (2010)
Il zercladur 2010 èn cumparidas las Annalas da la Societad Retorumantscha 123.
"Tabla da cuntegn Annalas 123 (2009)"
Matg 2010: Project da digitalisaziun da la «Rätoromanische Chrestomathie» a l'universitad da Cologna
A l'universitad da Cologna èn ins lundervi da digitalisar la «Rätoromanische Chrestomathie» sut la direcziun da prof. dr. Jürgen Rolshoven. En il rom da quest project fa la Societad Retorumantscha la punt denter la Germania e la Svizra ed ha cunzun ina funcziun consultativa.
Dapli infurmaziuns:
http://www.spinfo.phil-fak.uni-koeln.de/forschung-drc.html
Schaner 2010: In nov redactur ed ina nova redactura per l'IDRG
La suprastanza da la Societad Retorumantscha ha occupà en sia sesida dals 20 da schaner la plazza da redacziun ch'era vegnida libra suenter la pensiun da dr. Felix Giger. La plazza partan danovamain dr. Matthias Grünert (Berna) e lic. fil. Silvana Derungs (Surcasti) en pensum parzial.
Il nov redactur e la nova redactura entran en plazza per l'emprim d’avrigl 2010.
November 2009: Publicaziun dal DC «Destins e cunfins» - Ovras cumplettas da Gion Deplazes
Il disc cumpact cun il titel «Destins e cunfins» cuntegna las Ovras cumplettas 1-14 da Gion Deplazes, en tut ca. 4600 paginas en il format PDF 1.4. Il format lubescha da tschertgar titels, pleds ed expressiuns en l’entira ovra e da chattar quai ch’ins tschertga entaifer paucas secundas. Quai fa dal disc in excellent instrument da lavur, spezialmain per studentas e students u era per persunas ch'instrueschan. In'ulteriura ritgezza è la pussaivladad da stampar ils singuls texts e da lavurar cun els electronicamain.
La structuraziun dals texts e l'impaginaziun correspundan exactamain a quella da las ovras originalas. Quai renda l'ovra citabla. Sulettamain il curs da las lingias n'è betg adina identic.
Il disc cumpact custa 30.- fr. ed ins al po retrair directamain da l'Institut dal DRG, Ringstrasse 34, 7000 Cuira, tel.: 081 284 66 42, e-mail: info@drg.ch
Settember 2009: Publicaziun dal cudesch «Die Jugendjahre des Johannes Barandun / La giuvantegna dilg Johannes Barandun»
Il cudesch da tempra autobiografica descriva il viadi aventurus d'in simpel giuvenot da Veulden tras l'Europa e l'Africa dal Nord. L'ovra da 300 paginas è vegnida translatada en tudestg da dr. Cristian Collenberg e da dr. Felix Giger sin iniziativa da signur Plasch Barandun. L'ediziun originala da 1864 è daditg exausta, per quest motiv vegn ella agiuntada en fuorma digitala sin in DC.
Il cudesch è d'empustar directamain tar il «Bündner Buchvertrieb (BBV)» sut la suandanta adressa:
http://www.casanova.ch/shop/detail.cfm?ID=598&customerid=128045194.230.45.201
Matg 2009: Publicaziun da la DVD «La Fibla»
«La Fibla», il cudesch per l'emprima classa, è cumparida per l'emprima giada l'onn 1932. Ella è vegnida messa en surmiran dal scolast Andreia Steier (1875-1937) ed illustrada da l'artist Philipp Arlen (1876-1944). La DVD cuntegna tut las 78 paginas da la «Fibla» sco era l'introducziun da l'autur en purtrets singuls cun auta resoluziun. Ins po stampar quellas per diever privat. Il dretg da tut las ulteriuras applicaziuns pussaivlas resta tar l'Institut dal DRG. La DVD è da retrair directamain dal DRG (tel. 081 / 284 66 42 u mail: info@drg.ch) per 50.-.
