Glindesdi, ils 24 d’october a las 18 uras, preschenta Michele Luigi Badilatti sia dissertaziun en la Biblioteca chantunala dal Grischun. Andri Casanova prelegia or da l’ovra e Martina Linn accumpogna la vernissascha musicalmain cun chanzuns rumantschas. Claudio Spescha moderescha l’arranschament.

En sia dissertaziun è il redactur dal DRG Michele Luigi Badilatti s’occupà cun il rapport da viadi istoric da Gion Casper Collenberg. Quel era naschì il 1733 a Lumbrein ed emigrà en giuvens onns en Frantscha. En ses rapport «Viadi en l’Isla de Fronscha» (1765/66) descriva el las aventuras durant il viadi sur mar davent da Lorient en la colonia franzosa Île de France, il Mauritius dad oz. Igl era in viadi plain privels vers il nunenconuschent.

Questa ediziun critica dal «Viadi en l’Isla de Fronscha» cumpara en la retscha Romanica Rætica e renda accessibel per l’emprima giada tut il text original sursilvan. Ina translaziun tudestga commentada cumplettescha l’ediziun.

L’entrada a la vernissascha è libra. I vegn supplitgà da s’annunziar: info@kbg.gr.ch / Tel. 081 257 28 28

Il cudesch pon ins cumprar directamain al lieu ubain suenter la vernissascha en nossa butia online.