La Societad Retorumantscha daventa pli visibla

Venderdi saira, ils 2 da matg, ha la Societad Retorumantscha (SRR) salvà sia radunanza annuala a Cuira en la Sala Muntanella da la Chasa RTR. En il center da la radunanza è stada la nova via che la SRR vul enchaminar. Fin uss eran ils commembradis liads ad in abunament da las publicaziuns da l’uniun, damai ubain in abunament da las Annalas da la Societad Retorumantscha ubain dal Dicziunari Rumantsch Grischun. Da nov è il commembradi distatgà dals abunaments e la Societad daventa averta per scadina persuna ch’è interessada da persequitar e sustegnair ina perscrutaziun persistenta da la lingua e cultura rumantscha – cun u senza retrair las publicaziuns da l’uniun. La radunanza ha deliberà l’actualisaziun dals statuts e las stipulaziuns da las contribuziuns da commembradi. La presidenta Corina Casanova ha preschentà il program d’activitads per il 2025 cun differentas vernissaschas e dis da las portas avertas.

Ina part essenziala da la nova via da la SRR è dad esser pli visibla. Ina nova pagina d’internet è en elavuraziun. A la radunanza è vegnì preschentà il nov logo da la SRR cun in R blau sco letra emblematica per il rumantsch e per las retschertgas che la SRR persequitescha en connex cun la lingua rumantscha. En il medem mument vegn er adattà il logo da l’Institut dal Dicziunari Rumantsch Grischun a quel da sia uniun purtadra; il logo da l’Institut dal DRG è medemamain in R. 

Ultra da quai ha la radunanza elegì da nov en suprastanza da la SRR l’advocat dr. Gieri Caviezel e Luana Bergamin, funcziunaria da sport e commembra dal Cussegl grond dal Grischun. Sco vicepresident ha la radunanza elegì dr. Martín Camenisch, istoricher e docent a la Scola auta da pedagogia dal Grischun.

Suenter la radunanza ha gì lieu il program accumpagnant: En referats curts han Ralf Beer, Giuanna Caviezel ed Ursin Lutz dà in’invista divertenta en pleds rumantschs e projects da perscrutaziun davart la lingua rumantscha ed uschia preschentà la lavur promovida da la SRR. Alternant als referats ha la chantautura engiadinaisa Martina Linn cumplettà la saira cun sias chanzuns rumantschas.

Dapli davart il commembradi la Societad Retorumantscha datti qua.