Dacurt ha la Societad Retorumantscha elegì Daniel Telli e Stefano Negrinelli sco assistents scientifics en la redacziun dal Dicziunari Rumantsch Grischun (DRG).

Il DRG è in dals quatter Vocabularis naziunals da la Svizra e documentescha scientificamain la lingua rumantscha cun tut ses idioms e dialects. La Societad Retorumantscha è l’uniun purtadra e l’editura dal DRG.

Stefano Negrinelli è oriund da Lugano ed ha studegià litteratura e linguistica taliana ed istorgia generala a l’Universitad da Turitg. En sia lavur da doctorat cun il titel «Gli esiti delle occlusive velari latine nelle varietà retoromanze grigionesi dell’AIS» è el sa fatschentà minuziusamain cun la dialectologia rumantscha e cun la fonetica istorica dals idioms e dialects rumantschs. El entra en la redacziun dal DRG il 1. da mars 2024.

Daniel Telli è oriund da Trin ed ha studegià filologia nordica e litteratura e linguistica englaisa a l’Universitad da Turitg. Da preschent è el manader da la partiziun «Lingua» da la Lia Rumantscha a Cuira. El entra en sia nova plazza il 1. d’avrigl 2024.